Bundsautobahn 392

De Bundsautobahn 392 (Afk.: BAB 392 oder ok A 392) is en öörtliche Autobahn in Neddersassen mit en Samtläng vun opstunns 4 km. De Autobahn is ok ünner den Naam Bronswieker Noordtangent bekannt.

An sik weer plaant, de A 392 bit na de A 2 an de Anlusssteed Watenbüttel uttoboen. An de Anslussteed Hamborger Straat sünd ok eenige Vörleistungen för’n wieteren Utbo in Richt Oosten to sehn. Dor schüll de Autobahn anfangs bit na de Anslusssteed Bronswiek-Oost (Berliner Heerstraat) wieterföhrt warrn. Wieter Anslusstseden schülln dorbi an’n Bienroder Weg un an de Bevenroder Straat inricht warrn. Man, en Ünnersöken, de in’n Opdrag vun de Stadt Bronswiek maakt worrn is, raat dorto, de Verlängern vun de Autobahn nich to maken. Man müss dorvun utgahn, dat de Feernverkehr ut den Ruum Hessen in Richt na Berlin de A 392 denn as Afkörten twüschen de A 39 un de A 2 bruken de. Un ok de Verkehr ut Wulfsborg in Richt Bronswiek-Mitt oder na’t VW-Wark Bronswiek weer den Weg över de utwiete A 392 nehmen.

Tosätzlich dee en bannige Last dör Larm op de Oortsdelen twüschen de A 2 un de A 392 tokamen. De Bokosten sünd na de Ünnersöken as teemlich hooch antonehmen, as de Infrastruktur düchtig kumplex is, de to dweeren weer. Dorgegen steiht blots de Entlasten vun’n binnerstädischen Verkehr in’t Rebeet Rebenring un den noordööstlichen Deel vun de B 248. Dat Gootachten raat de Stadt dorüm, an de Steed vun de Autobahn en normale Straat twüschen de Hamborger Staat un den Bienroder Weg to boen, vun wegen dat de för den Feernverkehr nich intressant weer un se för de Entlasten utrecken de.

De Wieterbo vun de A 392 warrt opstunns blots an’t westliche Enn plaant, wobi de Fohrbahn an’n süüdlichen un westlichen Rand vun Bronswiek-Watenbüttel langs föhrt un op Hööch vun’t Affall-Entsorgens-Zentrum mit de Celler Heerstraat anslaten warrt.

En boliche Sünnerheit is, dat vun’t Autobahnkrüüz Ölper ut de Hööftfohrbahn direkt in de Celler Straat övergeiht, wiel de Verlängern na de Hamborger Straat an de Blangenfohrbahn ansett is.